ПРАВИЛО КО СВЯТОМУ ПРИЧАЩЕНИЮ

        Молитвами святых отец наших, Господи Иисусе Христе Боже наш, помилуй нас. Аминь.
        Царю Небесный, Утешителю, Душе истины, Иже везде сый и вся исполняяй, Сокровище благих и жизни Подателю, прииди и вселися в ны, и очисти ны от всякия скверны, и спаси, Блаже, души наша. (От Пасхи до Вознесения вместо этой молитвы читается тропарь: "Христос воскресе из мертвых, смертию смерть поправ, и сущим во гробех живот даровав". (Трижды) От Вознесения до Троицы начинаем молитвы со "Святый Боже...", опуская все предшествующие.)
        Святый Боже, Святый Крепкий, Святый Безсмертный, помилуй нас.
        Святый Боже, Святый Крепкий, Святый Безсмертный, помилуй нас.
        Святый Боже, Святый Крепкий, Святый Безсмертный, помилуй нас.
        Слава Отцу и Сыну и Святому Духу, и ныне и присно и во веки веков. Аминь.
        Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. Господи, помилуй. Господи, помилуй.
        Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
        Приидите, поклонимся Цареви нашему Богу. (Поклон)
        Приидите, поклонимся и припадем Христу, Цареви нашему Богу. (Поклон)
        Приидите, поклонимся и припадем Самому Христу, Цареви и Богу нашему. (Поклон)
Псалом 22.
        Господь пасет мя, и ничтоже мя лишит. На месте злачне, тамо всели мя: на воде покойне воспита мя. Душу мою обрати, настави мя на стези правды, имене ради Своего. Аще бо и пойду посреде сени смертныя, не убоюся зла, яко Ты со мною еси: жезл Твой и палица Твоя, та мя утешиста. Уготовал еси предо мною трапезу, сопротив стужающим мне: умастил еси елеом главу мою, и чаша Твоя упоявающи мя яко державна. И милость Твоя поженет мя вся дни живота моего, и еже вселитимися в дом Господень, в долготу дний.
Псалом 23.
        Господня земля, и исполнение ея, вселенная, и вси живущии на ней. Той на морях основал ю есть, и на реках уготовал ю есть. Кто взыдет на гору Господню; или кто станет на месте святем Его; Неповинен рукама, и чист сердцем, иже не прият всуе душу свою, и не клятся лестию искреннему своему. Сей приимет благословение от Господа, и милостыню от Бога Спаса своего. Сей род ищущих Господа, ищущих лице Бога Иаковля. Возьмите врата князи ваша, и возмитеся врата вечная: и внидет Царь Славы. Кто есть сей Царь Славы; Господь крепок и силен, Господь силен в брани. Возьмите врата князи ваша, и возмитеся врата вечная: и внидет Царь Славы. Кто есть сей Царь Славы; Господь сил, Той есть Царь Славы.
Псалом 115.
        Веровах, темже возглаголах: аз же смирихся зело. Аз же рех во изступлении моем: всяк человек ложь. Что воздам Господеви о всех, яже воздаде ми; Чашу спасения прииму, и имя Господне призову: Молитвы моя Господеви воздам пред всеми людьми Его. Честна пред Господем смерть преподобных Его. О Господи, аз раб Твой, аз раб Твой, и сын рабыни Твоея: растерзал еси узы моя. Тебе пожру жертву хвалы, и во имя Господне призову: Молитвы моя Господеви воздам пред всеми людьми Его. Во дворех дому Господня, посреде тебе, Иерусалиме.

        Слава Отцу и Сыну и Святому Духу, и ныне и присно и во веки веков. Аминь.
Аллилуия, Аллилуия, Аллилуия слава Тебе Боже. (Трижды)
Господи помилуй. (Трижды)
Таже тропарь, глас 2:
        Беззакония моя презри, Господи, от Девы рождейся, и сердце мое очисти, храм то творя Пречистому Твоему Телу и Крови: ниже отрини мене от Твоего лица, без числа имеяй велию милость.
Слава Отцу и Сыну и Святому Духу
        Во причастие святынь Твоих како дерзну недостойный? Аще бо дерзну к Тебе приступити с достойными, хитон мя обличает, яко несть вечерний, и осуждение исходатайствую многогрешной души моей. Очисти, Господи, скверну души моея, и спаси мя, яко Человеколюбец.
        И ныне и присно и во веки веков. Аминь.
Многая множества моих, Богородице, прегрешений, к Тебе прибегох, Чистая, спасения требуя: посети немощствующую мою душу, и моли Сына Твоего и Бога нашего, дати ми оставление, яже содеях лютых, Едина Благословенная.
Псалом 50
        Помилуй мя, Боже, по велицей милости Твоей, и по множеству щедрот Твоих очисти беззаконие мое. Наипаче омый мя от беззакония моего, и от греха моего очисти мя; яко беззаконие мое аз знаю, и грех мой предо мною есть выну. Тебе единому согреших и лукавое пред Тобою сотворих; яко да оправдишися во словесех Твоих, и победиши внегда судити Ти. Се бо, в беззакониих зачат есмь, и во гресех роди мя мати моя. Се бо, истину возлюбил еси; безвестная и тайная премудрости Твоея явил ми еси. Окропиши мя иссопом, и очищуся; омыеши мя, и паче снега убелюся. Слуху моему даси радость и веселие; возрадуются кости смиренныя. Отврати лице Твое от грех моих и вся беззакония моя очисти. Сердце чисто созижди во мне, Боже, и дух прав обнови во утробе моей. Не отвержи мене от лица Твоего и Духа Твоего Святаго не отыми от мене. Воздаждь ми радость спасения Твоего и Духом Владычним утверди мя. Научу беззаконныя путем Твоим, и нечестивии к Тебе обратятся. Избави мя от кровей, Боже, Боже спасения моего; возрадуется язык мой правде Твоей. Господи, устне мои отверзеши, и уста моя возвестят хвалу Твою. Яко аще бы восхотел еси жертвы, дал бых убо: всесожжения не благоволиши. Жертва Богу дух сокрушен; сердце сокрушенно и смиренно Бог не уничижит. Ублажи, Господи, благоволением Твоим Сиона, и да созиждутся стены Иерусалимския. Тогда благоволиши жертву правды, возношение и всесожигаемая; тогда возложат на олтарь Твой тельцы.

Песнь 1.

        Ирмос: Грядите, людие, поим песнь Христу Богу, раздельшему море, и наставльшему люди, яже изведе из работы египетския, яко прославися.
        Сердце чисто созижди во мне, Боже, и дух прав обнови во утробе моей.
Хлеб живота вечнующаго да будет ми Тело Твое Святое, благоутробне Господи, и честная Кровь, и недуг многообразных исцеление.
        Не отвержи мене от лица Твоего, и Духа Твоего Святаго не отыми от мене.
Осквернен делы безместными окаянный, Твоего пречистаго Тела и Божественныя Крове недостоин есмь, Христе, причащения, егоже мя сподоби.
Пресвятая Богородице, спаси нас.
        Земле благая, благословенная Богоневесто, клас прозябшая неоранный и спасительный миру, сподоби мя, сей ядуща, спастися.

Песнь 3

        Ирмос: На камени мя веры утвердив, разширил еси уста моя на враги моя. Возвесели бо ся дух мой, внегда пети: несть свят, якоже Бог наш, и несть праведен паче Тебе, Господи.
        Сердце чисто созижди во мне, Боже, и дух прав обнови во утробе моей.
Слезныя ми подаждь, Христе, капли, скверну сердца моего очищающия: яко да благою совестию очищен, верою прихожду и страхом, Владыко, ко причащению Божественных даров Твоих.
        Не отвержи мене от лица Твоего, и Духа Твоего Святаго не отыми от мене.
Во оставление да будет ми прегрешений пречистое Тело Твое, и Божественная Кровь, Духа же Святаго общение, и в жизнь вечную, Человеколюбче, и страстей и скорбей отчуждение.
        Пресвятая Богородице, спаси нас.
Хлеба животнаго Трапеза Пресвятая, свыше милости ради сшедшаго, и мирови новый живот дающаго, и мене ныне сподоби, недостойнаго, со страхом вкусити сего, и живу быти.

Песнь 4

        Ирмос: Пришел еси от Девы, не ходатай, ни ангел, но Сам, Господи, воплощся, и спасл еси всего мя человека. Тем зову Ти: слава силе Твоей, Господи.
Сердце чисто созижди во мне, Боже, и дух прав обнови во утробе моей.
        Восхотел еси, нас ради воплощся, Многомилостиве, заклан быти яко овча, грех ради человеческих; темже молю Тя: и моя очисти согрешения.
        Не отвержи мене от лица Твоего, и Духа Твоего Святаго не отыми от мене.
Исцели души моея язвы, Господи, и всего освяти, и сподоби, Владыко, яко да причащуся тайныя Твоея Божественныя вечери, окаянный.
Пресвятая Богородице, спаси нас.
        Умилостиви и мне Сущаго от утробы Твоея, Владычице, и соблюди мя нескверна раба Твоего и непорочна, яко да прием умнаго бисера, освящуся.

Песнь 5

        Ирмос: Света подателю и веков Творче, Господи, во свете Твоих повелений настави нас: разве бо Тебе иного бога не знаем.
        Сердце чисто созижди во мне, Боже, и дух прав обнови во утробе моей.
Якоже предрекл еси, Христе, да будет убо худому рабу Твоему, и во мне пребуди, якоже обещался еси: се бо Тело Твое ям Божественное и пию Кровь Твою.
        Не отвержи мене от лица Твоего, и Духа Твоего Святаго не отыми от мене.
Слове Божий и Боже, угль Тела Твоего да будет мне, помраченному, в просвещение и очищение оскверненной души моей Кровь Твоя.
Пресвятая Богородице, спаси нас.
        Марие, Мати Божия, благоухания честное селение, Твоими молитвами сосуд мя избранный соделай, яко да освящений причащуся Сына Твоего.

Песнь 6

        Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.
        Сердце чисто созижди во мне, Боже, и дух прав обнови во утробе моей.
Ум, душу и сердце освяти, Спасе, и тело мое, и сподоби неосужденно, Владыко, к страшным Тайнам приступити.
        Не отвержи мене от лица Твоего, и Духа Твоего Святаго не отыми от мене.
Да бых устранился от страстей, и Твоея благодати имел бы приложение, живота же утверждение, причащением Святых, Христе, Таин Твоих.
Пресвятая Богородице, спаси нас.
        Божие, Боже, Слово Святое, всего мя освяти, ныне приходящаго к Божественным Твоим Тайнам, Святыя Матере Твоея мольбами.
Кондак, глас 2
        Хлеб, Христе, взяти не презри мя, Тело Твое, и Божественную Твою ныне Кровь, пречистых, Владыко, и страшных Твоих Таин причаститися окаяннаго, да не будет ми в суд, да будет же ми в живот вечный и безсмертный.

Песнь 7

        Ирмос: Телу златому премудрыя дети не послужиша, и в пламень сами поидоша, и боги их обругаша, среди пламене возопиша, и ороси я ангел: услышася уже уст ваших молитва.
        Сердце чисто созижди во мне, Боже, и дух прав обнови во утробе моей.
Источник благих, причащение, Христе, безсмертных Твоих ныне Таинств да будет ми свет, и живот, и безстрастие, и к преспеянию же и умножению добродетели Божественнейшия ходатайственно, едине Блаже, яко да славлю Тя.
        Не отвержи мене от лица Твоего, и Духа Твоего Святаго не отыми от мене.
Да избавлюся от страстей, и врагов, и нужды, и всякия скорби, трепетом и любовию со благоговением, Человеколюбче, приступаяй ныне к Твоим безсмертным и Божественным Тайнам, и пети Тебе сподоби: благословен еси, Господи, Боже отец наших.
        Пресвятая Богородице, спаси нас.
Спаса Христа рождшая паче ума, Богоблагодатная, молю Тя ныне, раб Твой, Чистую нечистый: хотящаго мя ныне к пречистым Тайнам приступити, очисти всего от скверны плоти и духа.

Песнь 8

        Ирмос: В пещь огненную ко отроком еврейским снизшедшаго, и пламень в росу преложшаго Бога, пойте дела яко Господа, и превозносите во вся веки.
Сердце чисто созижди во мне, Боже, и дух прав обнови во утробе моей.
        Небесных, и страшных, и Святых Твоих, Христе, ныне Таин, и Божественныя Твоея и тайныя вечери общника быти и мене сподоби, отчаяннаго, Боже Спасе мой.
Не отвержи мене от лица Твоего, и Духа Твоего Святаго не отыми от мене.
Под Твое прибег благоутробие, Блаже, со страхом зову Ти: во мне пребуди, Спасе, и аз, якоже рекл еси, в Тебе; се бо дерзая на милость Твою, ям Тело Твое, и пию Кровь Твою.
        Пресвятая Троице, Боже наш, слава Тебе.
Трепещу, приемля огнь, да не опалюся яко воск и яко трава; оле страшнаго таинства! оле благоутробия Божия! Како Божественнаго Тела и Крове брение причащаюся и нетленен сотворяюся?

Песнь 9

        Ирмос: Безначальна Родителя Сын, Бог и Господь, воплощься от Девы нам явися, омраченная просветити, собрати расточенная: тем всепетую Богородицу величаем.
Сердце чисто созижди во мне, Боже, и дух прав обнови во утробе моей.
Христос есть, вкусите и видите: Господь нас ради, по нам бо древле бывый, единою Себе принес, яко приношение Отцу Своему, присно закалается, освящаяй причащающияся.
        Не отвержи мене от лица Твоего, и Духа Твоего Святаго не отыми от мене.
Душею и телом да освящуся, Владыко, да просвещуся, да спасуся, да буду дом Твой причащением Священных Таин, живущаго Тя имея в себе со Отцем и Духом, Благодетелю Многомилостиве.
        Воздаждь ми радость Спасения Твоего и Духом Владычним утверди мя.
Якоже огнь да будет ми и яко свет, Тело Твое и Кровь, Спасе мой, пречестная, опаляя греховное вещество, сжигая же страстей терние, и всего мя просвещая, покланятися Божеству Твоему.
        Пресвятая Богородице, спаси нас.
Бог воплотися от чистых кровей Твоих; темже всякий род поет Тя, Владычице, умная же множества славят, яко Тобою яве узреша всеми Владычествующаго, осуществовавшагося человечеством.
        Другой канон ко Святому Причащению Пречистаго Тела и Крове Господа Бога и Спаса нашего Иисуса Христа. Творение святаго Симеона Новаго Богослова.

Песнь 1.

        Ирмос: Грядите людие, поим песнь Христу Богу, раздельшему море, и наставльшему люди, яже изведе из работы египетския, яко прославися.
        Сердце чисто созижди во мне, Боже, и дух прав обнови во утробе моей.
Виждь, душе, Христа закалаема на Божественней Трапезе и не беседуй, окаянная, прилежно со други своими, Бога бо прогневляеши, многогрешная.
        Не отвержи мене от лица Твоего, и Духа Твоего Святаго не отыми от мене.
На небесех Ангели со страхом предстоят, ты же, окаянная, без страха стоиши глумяшися, видящи Спаса Христа закалаема.
        Слава Отцу и Сыну и Святому Духу
Кая душа видящи, или кий человек зря ныне совершаемых, Христа закалаема, иерея служаща со страхом, и не славит Раздробляемаго.
И ныне и присно и во веки веков. Аминь.
        Слово Отчее вселися во утробу Твою, Дево Марие Чистая, нас обнови, воплотивыйся волею, и Божественныя Плоти причащатися сподоби.

Песнь 3.

        Ирмос: Утверди нас в Тебе, Господи, древом умерщвлей грех, и страх Твой всади в сердца нас, поющих Тя.
        Сердце чисто созижди во мне, Боже, и дух прав обнови во утробе моей.
Сподоби нас Тела Твоего причаститися, Спасе, неосужденно, и Крови Твоея Честныя, и славити Твою благостыню.
        Не отвержи мене от лица Твоего, и Духа Твоего Святаго не отыми от мене.
Вразуми нас в страсе Твоем, Спасе наш, Божественную святую службу со страхом многим принести Тебе сподоби.
        Слава Отцу и Сыну и Святому Духу
Проповедник вопиет, повелевая нам всегда в Дом Божий приходити, не обленимся убо, но потецем ныне, яко время есть.
        И ныне и присно и во веки веков. Аминь.
Обожила еси нас Божественным Твоим зачатием, Дево, Бога бо прияла еси во чреве заченши, Егоже Плоть купно снедаем.
Господи помилуй, трижды.
        Седален, глас 2:
        Огнь и Свет буди ми, Спасе, приятие Пречистых и Животворящих Твоих Таин, пожигая греховный плевел, и просвещая всего ко истинному богословию. Не издам бо святыни вражией лести, ни Тебе дам целования лестна: но яко блудница припадаю Ти, и яко разбойник исповедая Тя, вопию Ти: помяни мя, Господи, во Царствии Твоем.
Слава Отцу и Сыну и Святому Духу, и ныне и присно и во веки веков. Аминь.
        Божию естеству общницы быхом, Тобою Богородице Приснодево, Бога бо воплощшася родила еси нам, темже Тя по долгу поюще, непрестанно величаем.

Песнь 4.

        Ирмос: Пришел еси от Девы, ни ходатай, ни Ангел, но Сам, Господи, воплощся, и спасл еси всего мя человека, тем зову Ти: слава силе Твоей, Господи.
Сердце чисто созижди во мне, Боже, и дух прав обнови во утробе моей.
        Станем убо вси со страхом и трепетом, очи сердечнии горе имуще, ко Спасу вопиюще: утверди нас и вразуми, Боже Щедрый, в страсе Твоем.
        Не отвержи мене от лица Твоего, и Духа Твоего Святаго не отыми от мене.
Царь всех происходит, освящая всех нас входом Своим яко Милосерд, ты же видяще Его, о душе моя, не восхлащаешися страхом, глаголюще неподобная.
Слава Отцу и Сыну и Святому Духу
        Горе имеем сердца, дольняя возненавидевше, идеже и житие наше есть. Вси должни есмы тако жити, а не яко змия поползатися по земли.
И ныне и присно и во веки веков. Аминь.
        Лоза, иже грозд Божественный прозябши без семене, Ты бысть Дево Мати Богоневестная, и души возвеселила еси, благочестно Богородицу Тя исповедающих.

Песнь 5.

        Ирмос: Света Подателю и веков Творче, Господи, во свете Твоих повелений настави нас, разве бо Тебе иного бога не знаем.
        Сердце чисто созижди во мне, Боже, и дух прав обнови во утробе моей.
Священник, братие, выю приклоняет за ны молитися, мы же, стояще, прелагаемся умом к терновным житейским печалем.
        Не отвержи мене от лица Твоего, и Духа Твоего Святаго не отыми от мене.
Преосквернену душу мою и устне мои имый нечисте, Господи, ныне же како смею приближитися к Тебе, и прияти Тело Твое, но Ты яви мя достойна.
Слава Отцу и Сыну и Святому Духу
        Рцы, о человече, бисер пресветлый прияти хотя, стоиши присно и смеешися, и твориши яже на гнев Бога подвизают, и како хощеши к Нему приступити.
И ныне и присно и во веки веков. Аминь.
        В плотстем чреве естеством Безплотнаго понесла еси, паче естества от Тебе воплощшася Пренепорочная, и Божественныя Плоти нас причащатися сподоби.

Песнь 6.

        Ирмос: В бездне греховней валяяся, неизследную милосердия Твоего призываю бездну: от тли, Боже, мя возведи.
        Сердце чисто созижди во мне, Боже, и дух прав обнови во утробе моей.
Царю смертному и властем со страхом предстоим, зде же, братие, стояще не боимся, видяще всеми Владущаго.
        Не отвержи мене от лица Твоего, и Духа Твоего Святаго не отыми от мене.
Сон и прах еси, о человече, трава и сень, что убо возносишися? Но во гроб приникнув, виждь своего образа красоту и плачися.
        Слава Отцу и Сыну и Святому Духу
Со страхом и трепетом приступим вси к Божественным Тайнам Христовым, Истое и Святое Тело Его приимем, Истую и Святую и Честную Его Кровь.
И ныне и присно и во веки веков. Аминь.
        Сень святая Ты явилася еси, Владычице Пренепорочная, в Тебе бо воплощся Бог и явися, якоже и Плоть Свою мiрови дал есть.

        Господи помилуй, трижды.
        Слава Отцу и Сыну и Святому Духу, и ныне и присно и во веки веков. Аминь.
        Кондак, глас 6.
        Вечери Твоея Тайныя днесь, Сыне Божий, причастника мя приими; не бо врагом Твоим Тайну повем, ни лобзания Ти дам яко Иуда, но яко разбойник, исповедаю Тя: помяни мя, Господи, во Царствии Твоем.
Икос:
        Во светлостех святых Твоих, како вниду недостойный? Аще бо дерзну внити в чертог, одежда мя обличает, яко несть брачна, связан извержен буду, и изгнан от Ангел, очисти, Господи, скверну души моея, и спаси мя яко Человеколюбец.

Песнь 7.

        Ирмос: Богопротивное веление беззаконнующаго мучителя, высок пламень вознесло есть. Христос же простре богочестивым отроком росу духовную, Сый благословен и препрославлен.
        Сердце чисто созижди во мне, Боже, и дух прав обнови во утробе моей.
Стояще и воспевающе Господеви с верою поучатися и вопити весь день правду Твою, Господи, оставльше же лжу ныне всю, обретаемся не творяще, яже поем.
        Не отвержи мене от лица Твоего, и Духа Твоего Святаго не отыми от мене.
Рцы, о человече, яже обещался к Богу, исповедав в Дому Святыни, того ради убойся, како не сохрани; или мнишися, окаянне, тленну человеку сия исповедав.
        Слава Отцу и Сыну и Святому Духу
        Душе моя окаянная, душе страстная, ужаснися зрящи Таинства преславная, и воздыхающи прослезися, в перси биющи, зовущи и глаголющи: Боже очисти мя, якоже и блуднаго.
        И ныне и присно и во веки веков. Аминь.
Прияла еси во утробе Своей, Мати Дево, Слово Собезначальное Отчее, и воплотися, якоже весть Сам изволи, вся ны сподоби, Владычице, Плоти Его причащатися, Богорадованная.

Песнь 8.

        Ирмос: В пещь огненную ко отроком еврейским снизшедшаго и пламень в росу преложшаго Бога, пойте дела яко Господа и превозносите во вся веки.
        Сердце чисто созижди во мне, Боже, и дух прав обнови во утробе моей.
Отца взываеши и вопиеши предстояще, душе, Всевидцу, и никакоже исполняющи повеление Его преподобно, прилежно, окаянная, смотри яже глаголеши, да не осудишися.
        Не отвержи мене от лица Твоего, и Духа Твоего Святаго не отыми от мене.
Господь заповедает нам, и учит, братие, яве всегда поучатися, и боятися присно смерти, и с верою Пречистое Тело Его, и Кровь приимати, во веки вся.
Слава Отцу и Сыну и Святому Духу
        Истязающему утробы, и сердца истинно испытующему, како смеем глаголати: остави нам, Боже, о них же Ти должни есмы, имуще ненависть ко всем братиям своим.
И ныне и присно и во веки веков. Аминь.
        Божественный Хлеб Жизни во чреве Твоем, Богомати, истинно испечеся, сохранив невредно ложнесна Твоя, Пренепорочная, темже, яко Питательницу нашу поем Тя во вся веки.

Песнь 9.

        Ирмос: Безначальна Родителя Сын, Бог и Господь, воплощься от Девы нам явися, омраченная просветити, собрати расточенная: тем Всепетую Богородицу величаем.
Сердце чисто созижди во мне, Боже, и дух прав обнови во утробе моей.
Освяти, Владыко, наш ум яко Милосерд, и души и телеса пришествием Твоим ныне Пречистаго Тела Твоего, Слове, и Крове Божественныя, да Тя прославляем, и непрестанно величаем.
        Не отвержи мене от лица Твоего, и Духа Твоего Святаго не отыми от мене.
Сподоби мя, Господи, Божественное Тело Твое и Честную Кровь рукама и устнама скверныма прияти ныне, Спасе мой, и что убо принесу, Владыко, многому долготерпению Твоему.
        Слава Отцу и Сыну и Святому Духу
Освяти, Господи, и вразуми, и утверди сердца, иже верою Божественное Тело Твое, и Честную Кровь приемлющих со страхом; покажи исполнители словес Твоих, и сыны Царствия Твоего.
        И ныне и присно и во веки веков. Аминь.
Бога Безплотнаго во чреве Своем вмещши, Того родила еси сугуба естеством, и истаявшее жаждею греховною естество наше, Мати Чистая, Святыни насытила еси, Владычице, Темже величаем Рождество Твое, Всепетая.

        Достойно есть яко воистинну блажити Тя, Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.
        Святый Боже, Святый Крепкий, Святый Безсмертный, помилуй нас. (Трижды)
Слава Отцу и Сыну и Святому Духу, и ныне и присно и во веки веков. Аминь.
Пресвятая Троице, помилуй нас; Господи, очисти грехи наша; Владыко, прости беззакония наша; Святый, посети и исцели немощи наша, имене Твоего ради.
Господи, помилуй. (Трижды)
        Слава Отцу и Сыну и Святому Духу, и ныне и присно и во веки веков. Аминь.
Отче наш, Иже еси на небесех! Да святится имя Твое, да приидет Царствие Твое, да будет воля Твоя, яко на небеси и на земли. Хлеб наш насущный даждь нам днесь; и остави нам долги наша, якоже и мы оставляем должником нашим; и не введи нас во искушение, но избави нас от лукаваго.
        Помилуй нас, Господи, помилуй нас; всякаго бо ответа недоумеюще, сию Ти молитву яко Владыце грешнии приносим: помилуй нас.
Слава Отцу и Сыну и Святому Духу
        Господи, помилуй нас, на Тя бо уповахом; не прогневайся на ны зело, ниже помяни беззаконий наших, но призри и ныне яко благоутробен, и избави ны от враг наших; Ты бо еси Бог наш, и мы людие Твои, вси дела руку Твоею, и имя Твое призываем.
И ныне и присно и во веки веков. Аминь.
        Милосердия двери отверзи нам, благословенная Богородице, надеющиися на Тя да не погибнем, но да избавимся Тобою от бед: Ты бо еси спасение рода христианскаго.
Господи, помилуй. (40 раз. И поклоны сколько хочешь)
И стихи:
        Хотя ясти, человече, Тело Владычне,
        Страхом приступи, да не опалишися: огнь бо есть.
        Божественную же пия Кровь ко общению,
        Первее примирися тя опечалившим.
        Таже дерзая, таинственное брашно яждь.
        Прежде причастия страшныя жертвы,
        Животворящаго Тела Владычня,
        Сим помолися образом со трепетом:

Молитва 1-я, святого Василия Великого

        Владыко Господи Иисусе Христе, Боже наш, Источниче жизни и безсмертия, всея твари видимыя и невидимыя Содетелю, безначальнаго Отца соприсносущный Сыне и собезначальный, премногия ради благости в последния дни в плоть оболкийся, и распныйся, и погребыйся за ны, неблагодарныя и злонравныя, и Твоею кровию обновивый растлевшее грехом естество наше, Сам, Безсмертный Царю, приими и мое грешнаго покаяние, и приклони ухо Твое мне, и услыши глаголы моя. Согреших бо, Господи, согреших на небо и пред Тобою, и несмь достоин воззрети на высоту славы Твоея: прогневах бо Твою благость, Твоя заповеди преступив, и не послушав Твоих повелений. Но Ты, Господи, незлобив сый, долготерпелив же и многомилостив, не предал еси мя погибнути со беззаконьми моими, моего всячески ожидая обращения. Ты бо рекл еси, Человеколюбче, пророком Твоим: яко хотением не хощу смерти грешника, но еже обратитися и живу быти ему. Не хощеши бо, Владыко, создания Твоею руку погубити, ниже благоволиши о погибели человечестей, но хощеши всем спастися, и в разум истины приити. Темже и аз, аще и недостоин есмь небесе и земли, и сея привременныя жизни, всего себе повинув греху, и сластем поработив, и Твой осквернив образ; но творение и создание Твое быв, не отчаяваю своего спасения, окаянный, на Твое же безмерное благоутробие дерзая, прихожду. Приими убо и мене, Человеколюбче Господи, якоже блудницу, яко разбойника, яко мытаря и яко блуднаго, и возьми мое тяжкое бремя грехов, грех вземляй мира, и немощи человеческия исцеляяй, труждающияся и обремененныя к Себе призываяй и упокоеваяй, не пришедый призвати праведныя, но грешныя на покаяние. И очисти мя от всякия скверны плоти и духа, и научи мя совершати святыню во страсе Твоем: яко да чистым сведением совести моея, святынь Твоих часть приемля, соединюся святому Телу Твоему и Крови, и имею Тебе во мне живуща и пребывающа, со Отцем, и Святым Твоим Духом. Ей, Господи Иисусе Христе, Боже мой, и да не в суд ми будет причастие пречистых и животворящих Таин Твоих, ниже да немощен буду душею же и телом, от еже недостойне тем причащатися, но даждь ми, даже до конечнаго моего издыхания, неосужденно восприимати часть святынь Твоих, в Духа Святаго общение, в напутие живота вечнаго, и во благоприятен ответ на Страшнем судищи Твоем: яко да и аз со всеми избранными Твоими общник буду нетленных Твоих благ, яже уготовал еси любящим Тя, Господи, в нихже препрославлен еси во веки. Аминь.

Молитва 2-я, святого Иоанна Златоуста

        Господи Боже мой, вем, яко несмь достоин, ниже доволен, да под кров внидеши храма души моея, занеже весь пуст и пался есть, и не имаши во мне места достойна еже главу подклонити; но якоже с высоты нас ради смирил еси Себе, смирися и ныне смирению моему, и якоже восприял еси в вертепе и в яслех безсловесных возлещи, сице восприими и в яслех безсловесныя моея души, и во оскверненное мое тело внити. И якоже не неудостоил еси внити и свечеряти со грешники в дому Симона прокаженнаго, тако изволи внити и в дом смиренныя моея души, прокаженныя и грешныя; и якоже не отринул еси подобную мне блудницу и грешную, пришедшую и прикоснувшуюся Тебе, сице умилосердися и о мне, грешнем, приходящем и прикасающем Ти ся; и якоже не возгнушался еси скверных ея уст и нечистых, целующих Тя, ниже моих возгнушайся сквернших оныя уст и нечистших, ниже мерзких моих и нечистых устен, и сквернаго и нечистейшаго моего языка. Но да будет ми угль пресвятаго Твоего Тела, и честныя Твоея Крове, во освящение и просвещение и здравие смиренней моей души и телу, во облегчение тяжестей многих моих согрешений, в соблюдение от всякаго диавольскаго действа, во отгнание и возбранение злаго моего и лукаваго обычая, во умерщвление страстей, в снабдение заповедей Твоих, в приложение Божественныя Твоея благодати и Твоего Царствия присвоение. Не бо яко презираяй прихожду к Тебе, Христе Боже, но яко дерзая на неизреченную Твою благость, и да не на мнозе удаляяйся общения Твоего, от мысленнаго волка звероуловлен буду. Темже молюся Тебе: яко един сый Свят, Владыко, освяти мою душу и тело, ум и сердце, чревеса и утробы, и всего мя обнови, и вкорени страх Твой во удесех моих, и освящение Твое неотъемлемо от мене сотвори; и буди ми помощник и заступник, окормляя в мире живот мой, сподобляя мя и одесную Тебе предстояния со святыми Твоими, молитвами и моленьми Пречистыя Твоея Матере, невещественных Твоих служителей и пречистых сил, и всех святых, от века Тебе благоугодивших. Аминь.

Молитва 3-я, святого Симеона Метафраста

        Едине чистый и нетленный Господи, за неизреченную милость человеколюбия наше все восприемый смешение, от чистых и девственных кровей паче естества Рождшия Тя, Духа Божественнаго нашествием и благоволением Отца присносущнаго, Христе Иисусе, премудросте Божия, и мире, и сило; Твоим восприятием животворящая и спасительная страдания восприемый, крест, гвоздия, копие, смерть, умертви моя душетленная страсти телесныя. Погребением Твоим адова пленивый царствия, погреби моя благими помыслы лукавая советования и лукавствия духи разори. Тридневным Твоим и живоносным воскресением падшаго праотца возставивый, возстави мя, грехом поползшагося, образы мне покаяния предлагая. Преславным Твоим вознесением плотское обоживый восприятие и сие десным Отца седением почтый, сподоби мя причастием Святых Твоих Таин десную часть спасаемых получити. Снитием Утешителя Твоего Духа сосуды честны священныя Твоя ученики соделавый, приятелище и мене покажи Того пришествия. Хотяй паки приити судити вселенней правдою, благоволи и мне усрести Тя на облацех, Судию и Создателя моего, со всеми святыми Твоими: да безконечно славословлю и воспеваю Тя, со безначальным Твоим Отцем и Пресвятым и Благим и Животворящим Твоим Духом, ныне и присно и во веки веков. Аминь.

Молитва 4-я, святого Иоанна Дамаскина

        Владыко Господи Иисусе Христе Боже наш, едине имеяй власть человеком оставляти грехи, яко благ и Человеколюбец презри моя вся в ведении и не в ведении прегрешения, и сподоби мя неосужденно причаститися Божественных, и преславных, и пречистых, и животворящих Твоих Таин, не в тяжесть, ни в муку, ни в приложение грехов, но во очищение, и освящение, и обручение будущаго живота и Царствия, в стену и помощь, и в возражение сопротивных, во истребление многих моих согрешений. Ты бо еси Бог милости, и щедрот, и человеколюбия, и Тебе славу возсылаем, со Отцем и Святым Духом, ныне и присно и во веки веков. Аминь.

Молитва 5-я, святого Василия Великого

        Вем, Господи, яко недостойне причащаюся пречистаго Твоего Тела и честныя Твоея Крове, и повинен есмь, и суд себе ям и пию, не разсуждая Тела и Крове Тебе, Христа и Бога моего, но на щедроты Твоя дерзая, прихожду к Тебе, рекшему: ядый Мою Плоть и пияй Мою Кровь, во Мне пребывает, и Аз в нем. Умилосердися убо, Господи, и не обличи мя, грешнаго, но сотвори со мною по милости Твоей; и да будут ми святая сия во исцеление, и очищение, и просвещение, и сохранение, и спасение, и во освящение души и тела; во отгнание всякаго мечтания, и лукаваго деяния, и действа диавольскаго, мысленне во удесех моих действуемаго, в дерзновение и любовь, яже к Тебе; во исправление жития и утверждение, в возращение добродетели и совершенства, во исполнение заповедей, в Духа Святаго общение, в напутие живота вечнаго, во ответ благоприятен на Страшнем судищи Твоем: не в суд или во осуждение.

Молитва 6-я, святого Симеона Нового Богослова

        От скверных устен, от мерзкаго сердца, от нечистаго языка, от души осквернены, приими моление, Христе мой, и не презри моих ни словес, ниже образов, ниже безстудия. Даждь ми дерзновенно глаголати, яже хощу, Христе мой, паче же и научи мя, что ми подобает творити и глаголати. Согреших паче блудницы, яже уведе, где обитаеши, миро купивши, прииде дерзостне помазати Твои нозе, Бога моего, Владыки и Христа моего. Якоже ону не отринул еси пришедшую от сердца, ниже мене возгнушайся, Слове: Твои же ми подаждь нозе, и держати и целовати, и струями слезными, яко многоценным миром, сия дерзостно помазати. Омый мя слезами моими, очисти мя ими, Слове. Остави и прегрешения моя, и прощение ми подаждь. Веси зол множество, веси и струпы моя, и язвы зриши моя, но и веру веси, и произволение зриши, и воздыхание слышиши. Не таится Тебе, Боже мой, Творче мой, Избавителю мой, ниже капля слезная, ниже капли часть некая. Несоделанное мое видесте очи Твои, в книзе же Твоей и еще несодеянная написана Тебе суть. Виждь смирение мое, виждь труд мой елик, и грехи вся остави ми, Боже всяческих: да чистым сердцем, притрепетною мыслию и душею сокрушенною нескверных Твоих причащуся и пресвятых Таин, имиже оживляется и обожается всяк ядый же и пияй чистым сердцем. Ты бо рекл еси, Владыко мой: всяк ядый Мою Плоть и пияй Мою Кровь, во Мне убо сей пребывает, в немже и Аз есмь. Истинно слово всяко Владыки и Бога моего: Божественных бо причащаяйся и Боготворящих благодатей, не убо есмь един, но с Тобою, Христе мой, Светом трисолнечным, просвещающим мир. Да убо не един пребуду кроме Тебе, Живодавца, дыхания моего, живота моего, радования моего, спасения миру. Сего ради к Тебе приступих, якоже зриши, со слезами, и душею сокрушенною, избавления моих прегрешений прошу прияти ми и Твоих живодательных и непорочных Таинств причаститися неосужденно, да пребудеши, якоже рекл еси, со мною треокаянным; да не кроме обрет мя Твоея благодати, прелестник восхитит мя льстивне, и прельстив отведет Боготворящих Твоих словес. Сего ради к Тебе припадаю и тепле вопию Ти: якоже блуднаго приял еси и блудницу пришедшую, тако приими мя, блуднаго и сквернаго, Щедре. Душею сокрушенною ныне бо к Тебе приходя, вем, Спасе, яко иный, якоже аз, не прегреши Тебе, ниже содея деяния, яже аз содеях. Но сие паки вем, яко не величество прегрешений, ни грехов множество превосходит Бога моего многое долготерпение и человеколюбие крайнее; но милостию сострастия тепле кающияся и чистиши, и светлиши, и света твориши причастники, общники Божества Твоего соделоваяй независтно, и странное и ангелом, и человеческим мыслем, беседуеши им многажды, якоже другом Твоим истинным. Сия дерзостна творят мя, сия вперяют мя, Христе мой. И дерзая Твоим богатым к нам благодеянием, радуяся вкупе и трепеща, огневи причащаюся трава сый, и странно чудо, орошаемь неопально, якоже убо купина древле неопальне горящи. Ныне благодарною мыслию, благодарным же сердцем, благодарными удесы моими, души и тела моего, покланяюся и величаю, и славословлю Тя, Боже мой, яко благословенна суща, ныне же и во веки.

Молитва 7-я, святого Иоанна Златоуста

        Боже, ослаби, остави, прости ми согрешения моя, елика Ти согреших, аще словом, аще делом, аще помышлением, волею или неволею, разумом или неразумием, вся ми прости яко благ и Человеколюбец, и молитвами Пречистыя Твоея Матере, умных Твоих служителей и святых сил, и всех святых, от века Тебе благоугодивших, неосужденно благоволи прияти ми святое и пречистое Твое Тело и честную Кровь, во исцеление души же и тела, и во очищение лукавых моих помышлений. Яко Твое есть Царство и сила и слава, со Отцем и Святым Духом, ныне и присно и во веки веков. Аминь.

Молитва 8-я, того же святого

        Несмь доволен, Владыко Господи, да внидеши под кров души моея; но понеже хощеши Ты яко Человеколюбец, жити во мне, дерзая приступаю; повелеваеши, да отверзу двери, яже Ты един создал еси, и внидеши со человеколюбием якоже еси, внидеши и просвещаеши помраченный мой помысл. Верую, яко сие сотвориши: не бо блудницу, со слезами пришедшую к Тебе, отгнал еси; ниже мытаря отвергл еси покаявшася; ниже разбойника, познавша Царство Твое, отгнал еси; ниже гонителя покаявшася оставил еси, еже бе: но от покаяния Тебе пришедшия вся, в лице Твоих другов вчинил еси, Един сый благословенный всегда, ныне и в безконечныя веки. Аминь.

Молитва 9-я, того же святого

        Господи Иисусе Христе, Боже мой, ослаби, остави, очисти и прости ми, грешному, и непотребному, и недостойному рабу Твоему, прегрешения, и согрешения и грехопадения моя, елика Ти от юности моея, даже до настоящаго дне и часа согреших: аще в разуме и в неразумии, аще в словесех или делех, или помышлениих и мыслех, и начинаниих, и всех моих чувствах. И молитвами безсеменно рождшия Тя, Пречистыя и Приснодевы Марии, Матере Твоея, единыя непостыдныя надежды и предстательства и спасения моего, сподоби мя неосужденно причаститися пречистых, безсмертных, животворящих и страшных Твоих Таинств, во оставление грехов и в жизнь вечную: во освящение и просвещение, крепость, исцеление, и здравие души же и тела, и в потребление и всесовершенное погубление лукавых моих помыслов, и помышлений, и предприятий, и нощных мечтаний, темных и лукавых духов; яко Твое есть Царство, и сила, и слава, и честь, и поклонение, со Отцем и Святым Твоим Духом, ныне и присно и во веки веков. Аминь.

Молитва 10-я, святого Иоанна Дамаскина

        Пред дверьми храма Твоего предстою и лютых помышлений не отступаю; но Ты, Христе Боже, мытаря оправдивый, и хананею помиловавый, и разбойнику рая двери отверзый, отверзи ми утробы человеколюбия Твоего и приими мя, приходяща и прикасающася Тебе, яко блудницу и кровоточивую: ова убо края ризы Твоея коснувшися, удобь исцеление прият, ова же пречистеи Твои нозе удержавши, разрешение грехов понесе. Аз же, окаянный, все Твое Тело дерзая восприяти, да не опален буду; но приими мя, якоже оныя, и просвети моя душевныя чувства, попаляя моя греховныя вины, молитвами безсеменно Рождшия Тя и небесных сил; яко благословен еси во веки веков. Аминь.

Молитва святого Иоанна Златоуста

        Верую, Господи, и исповедую, яко Ты еси воистинну Христос, Сын Бога живаго, пришедый в мир грешныя спасти, от нихже первый есмь аз. Еще верую, яко сие есть самое пречистое Тело Твое, и сия есть самая честная Кровь Твоя. Молюся убо Тебе: помилуй мя и прости ми прегрешения моя, вольная и невольная, яже словом, яже делом, яже ведением и неведением, и сподоби мя неосужденно причаститися пречистых Твоих Таинств, во оставление грехов и в жизнь вечную. Аминь.
Се приступаю к Божественному Причащению.
        Содетелю, да не опалиши мя приобщением:
        Огнь бо еси, недостойныя попаляяй.
        Но убо очисти мя от всякия скверны.
        Вечери Твоея тайныя днесь, Сыне Божий, причастника мя приими; не бо врагом Твоим тайну повем, ни лобзания Ти дам, яко Иуда, но яко разбойник исповедаю Тя: помяни мя, Господи, во Царствии Твоем.
        Боготворящую Кровь ужаснися человече, зря,
Огнь бо есть, недостойныя попаляяй.
        Божественное Тело и обожает мя и питает:
        Обожает дух, ум же питает странно.
        Усладил мя еси любовию, Христе, и изменил мя еси Божественным Твоим рачением; но попали огнем невещественным грехи моя, и насытитися еже в Тебе наслаждения сподоби: да ликуя возвеличаю, Блаже, два пришествия Твоя.
        Во светлостех Святых Твоих како вниду, недостойный? Аще бо дерзну совнити в чертог, одежда мя обличает, яко несть брачна, и связан извержен буду от ангелов. Очисти, Господи, скверну души моея, и спаси мя, яко Человеколюбец.

        Владыко Человеколюбче, Господи Иисусе Христе Боже мой, да не в суд ми будут Святая сия, за еже недостойну ми быти: но во очищение и освящение души же и тела, и во обручение будущия жизни и Царствия. Мне же, еже прилеплятися Богу, благо есть, полагати во Господе упование спасения моего.

        Вечери Твоея тайныя днесь, Сыне Божий, причастника мя приими; не бо врагом Твоим тайну повем, ни лобзания Ти дам, яко Иуда, но яко разбойник исповедаю Тя: помяни мя, Господи, во Царствии Твоем.
        следующие молитвы взяты из Требника, изданного по благословению Патриарха Иосифа

Молитва 1. Святаго Василия Великаго

        Владыко Святый Пречистый, Нескверный, Иже не унедостоивый за многую Твою милость острастившееся естество наше от греха, без греха и без скверны восприяти, и очистив то Святою Своею Кровию, излиявшеюся спасения ради создания Святых Твоих рук, иже неизреченное смотрение свершив, не несогрешших Тебе ради, ниже благоугодивших Тебе, но ради прогневавших Тя и отвергшихся, иже греха ради всякаго отчаявшихся спасения надежды. Сам бо рекл еси, Благий, не требовати здравым врача, но болезнующим, и пришел еси спасти не спасаемых, но погибших. Ты убо, Благоутробне, и мене недостойнаго Твоим надеющася щедротам, и дерзнувша приближитися к Пречистому Твоему Телу и Крови, приими Твоим благоутробием, и утерпи страшных Твоих Таин прияти причастника мое недостоинство. И не гнушайся, ниже прогневайся, ниже повинна мя представи, занеже грешен есмь и нечист, и недостойне прихожду. Но, о Любодушне Господи, подавый нам грешным Тело и Кровь Свою во оставление грехов, даждь ми ради причастия Их, Твоего еже во мне вселения, непотребнаго раба Твоего, и еже в Тебе пребывания, Благаго Владыки и Спасителя моего. Сотвори ми сих причастие, во облегчение несказанных тяжестей беззаконий моих, во избавление вины, во очищение души и телу. О грешных бо, о осужденных, о безответных, излиял еси Божественную и Животочную Кровь Свою многим милованием, юже сподоби мя неосужденно пити, и Животворное Твое ясти Тело. И да не будет ми недостойне ядущу и пиющу, Человеколюбче, причастие во осуждение, ниже в тяжчайший ответ, вместо еже получити оставление злых моих. Яко Ты свеси, вся Ведый. яко не дерзостне, ниже яко не осужден, или яко достоин сый со дерзновением прихожду, но со страхом и трепетом, и содроганием сердца и костей, и самых мозгов. Ведый бо самоосуждена себе и недостойна, еже и очима взирати страшную Твою Трапезу, но обаче, егоже ради явил еси грешным, неизреченное Свое милование, разделением Святаго Твоего Тела, излиянием Честныя Твоея Крове, желаю напитатися душепитательною Твоею сею Пищею, Христе Боже наш, и вметаю себе дерзостне в пучину милости Твоея, на Твоя покланяемыя, и нетленно творимыя зрю страсти, яже восприят человеколюбне, во оставление грехов наших, страхом и радостию содержим есмь: овым убо ради недостоинства моего, ово же ради надежды согрешенных ми прощения. Виждь убо смирение мое, Господи, и подаждь ми неповинне, и неосужденне прияти Твоя Божественныя и Боготворимыя Тайны, во очищение, во спасение, и во оставление зол моих, во отбежание будущия ми казни, и в получение славы, и в восприятие уготованных благ любящим Тя, и в Тебе живущим и пребывающим, молением Препрославленныя и Пречистыя Твоея Матере и всех Святых Твоих. Аминь.

Молитва 2. Святаго Василия Великаго

        Владыко Господи Боже наш, Единородный Сыне и Слове Живаго и Безсмертнаго Отца, Давый Себе о нас Жертву, ихже ради вочеловечися, да сообразны Своего образа покажеши нас, и присвоиши Себе причащением Животворящих Твоих Таин. Вознесу Тя яко подъял мя, и неси возвеселил враг моих о мне, но возвел еси от ада душу мою, и спасл мя еси от низходящих в ров. И ныне приклони ухо Твое ко мне, и услыши глаголы моя, и причастника мя сотвори недостойнаго, якоже Своему образу, сице и Пречистей Плоти Твоей, и Самой Честней Твоей Крови, во оставление грехов, в прощение согрешений, в Духа Святаго приобщение, презирая мне, благости ради богатства, вся вольная согрешения и невольная, яже в ведении моем бывшая и яже в неведении. Аще бо и недостоин есмь небеси и земли, но создание Твое есмь, и дело Пречистых Твоих рук. Аще и образ Твой преступлением заповедей Твоих растлих, презри моя согрешения, Едине вземляй грехи мiра и Безгрешный Господи. Тебе бо Единому согреших, и к Тебе припадаю Благому Богу моему, аще и злыми моими делы присно прогневляю Тя. Не возгнушайся мене нечистаго сердцем, осквернена суща устнама, страстнаго душею, но милости Твоей надеющася и приходяща. Приими мя якоже блудницу, и якоже разбойника, и мытаря, и прости ми множество многих злых моих дел, яко власть имый оставляти согрешающим согрешения, Пречистых ради Твоих Таин приобщения. И Углем убо Святаго Твоего Телесе страстныя души моея попалив движения, очисти сердце мое, якоже некогда устне пророка Твоего, страшнаго ради Твоего Серафима. Просвети же моя помышления светом веселия Твоего, и всего святости мя исполни, яко естеством Свят Сый. Причащением же Честныя Твоея Крове, веселия исполни сердце мое, и ум мой Твоим радованием. Вся моя уды телесныя умертви Святых Твоих Таин причащением, и всякаго свободи плотскаго желания наитием Святаго Твоего Духа. Ей, Боже, приходя и обитель творя со Отцем, и со Святым Духом Твоим, во всех Святых Твоих, сподобивый от мене грешнаго и недостойнаго приемлем бывати, в приносимей Тебе Безкровней Жертве безмерныя ради благости, Ты во мне пребуди, несуменне и неразлучне до кончины живота моего. И буди ми приложение жизни, избавляя от губителя, свет во откровение сокровенных Твоих Таин, Наставник в путь заповедей Твоих, в Царство Небесное, вечное веселие, во исполнение премудрости, в совершение слова, в зрение словес Твоих, таинник Божественных вещей, крепость на борители духи. И на еже во мне всякаго неподобнаго желания утомитель буди. Ей, Боже Единосущне Отцу, и нам Божий Слове, всяко буди ми Своему рабу, и Божественных Твоих Даров причащения, соединися ми во един дух, по иже ко Отцу Твоему и Богу, нас ради, недостойных, молению. Яко плоть от Плоти Твоея есмь, и кость от костей Твоих, и Тебе носяй есмь от божественнаго крещения, аще бо и одежду Твою оскверних. Ты бо еси рекий: ядый Мою Плоть, и пияй Мою Кровь, Аз в нем пребываю, и той во Мне, и Твоя есть слава во веки веков, Аминь.

Молитва 3. Святаго Иоанна Златоустаго

        Владыко Человеколюбче Господи Иисусе Христе, Боже мой, на щедроты Твоя надеяся, молю Тя, да не поставиши мене ошуюю Себе, с козлищи прогневавшими Тя. Ниже рцы ми: аминь глаголю тебе: не вем тебе. Но даждь ми по благости Своей, плач всегда и умиление, и смирение сердцу моему. И очисти е страхом Твоим причащения ради Пречистых и Животворящих Своих Таин, яко да будет церковь Твоея благодати. Аще бо и зело грешен есмь, и недостоин, но убо всегда в двери Твоя толку. Аще уныл есмь и ленив, и о своем спасении небрегий, но обаче в путь Твой шествую. Спаси мя ради милости Твоея, яко благословен еси Господи всяческих, и щедроты Твоя на всех делех Твоих, и Твоя есть Держава во веки, Аминь.

Молитва 4. Святаго Иоанна Златоустаго

        Владыко Господи Человеколюбче, да не во осуждение ми будет причастие Святых Твоих Таин, но во очищение и освящение души и телу, и во обретение будущия жизни и Царствия. Яко благословен еси во веки, Аминь.

Молитва 5. Святаго Симеона Метафраста

        Яко на Страшнем Твоем и нелицеприемнем предстояй Судилищи, Христе Боже, и осуждения подъемля, и слово творя о содеянных мною злых: сице днесь, прежде даже не приити дневи осуждения моего, у Святаго Твоего жертвенника предстоя пред Тобою, пред страшными и святыми Ангелы Твоими, преклонен от своея совести, приношу лукавая моя и беззаконная деяния, позорствую сия, и обличая уничижаю. Виждь, Господи, смирение мое, и остави вся грехи моя, виждь, яко умножишася паче влас главы моея беззакония моя. Кое убо не содеях зло; кий грех не сотворих в души моей; уже бо и делы содеях, блуд, прелюбодейство, превозношение, гордость, кичение, укорение, суровство, досады, непокорство, поклеп, лжу, злотечение, уничижение, клятвопреступление, оболгание, заклинание, хулу, празднословие, раждежение, смех неподобный, пиянство, объядение, чревобесие, гортанобесие, ненависть, зависть, сребролюбие, многостяжание, самолюбие, лихоимение, лихоимство, славолюбие, хищение, неправду, злоприобретение, мшелоимство, ревность, оклеветание, беззаконие, непослушание, мысли скверныя и помыслы нечисты и разслаблены, хульны же и несказанны, всякое мое чувство и всякий уд оскверних, растлих, непотребен сотворих, делателище быв всячески диаволе. И вем, Господи, яко беззакония моя превзыдоша главу мою: но безмерно есть множество щедрот Твоих, и милость неизреченна незлобивыя Твоея благости, и несть грех побеждающ человеколюбие Твое. Темже, пречудный Царю, незлобиве Господи, удиви и на мне грешнем милости Твоя, покажи благости Твоея силу, и яви крепость благоутробнаго милосердия Твоего, и обращающася прими мя грешнаго. Приими мя, якоже приял еси блуднаго, мытаря, разбойника, Манассию и блудницу. Приими мя пресогрешившего выше меры и словом, и делом, и помышлением, и безместным похотением, и безсловесных желанием. И якоже во единадесятый час пришедших приял еси, ничтоже достойно соделавших: тако приими и мене грешнаго: много бо согреших, и осквернихся, и опечалих Духа Твоего Святаго, и огорчих человеколюбную утробу Твою, и делом, и словом, и помышлением, в нощи и во дни, явленне же и неявленне, волею и неволею. И вем, яко яве представиши грехи моя предо мною таковы, яковы же мною содеяшася, и истяжеши слово со мною, о ихже разумом непрощенно согреших. Но Господи, Господи, да не праведным Судом Твоим, ниже яростию Твоею обличиши мя, ниже гневом Твоим накажеши мя: помилуй мя, Господи, яко не токмо немощен есмь, но и Твое есмь создание. Ты убо, Господи, утвердил еси на мне страх Твой, аз же лукавое пред Тобою сотворих. Тебе убо Единому согреших: но молю Тя, не вниди в суд с рабом Твоим. Аще бо беззакония назриши, Господи, Господи, кто постоит; аз бо есмь пучина греха, и несмь достоин, ниже доволен воззрети, и видети высоту небесную, от множества грехов моих, ихже несть числа: всякое бо злодеяние, и умышление, и ухищрение сатанино, и коварство, и растления, и различная истицания, рукоблудия, деторастления, уничижения, злопомнения, советования ко греху, клятвопреступления, скоктания, и иныя тмочисленныя страсти не оскудеша от мене. Киими бо не растлихся грехи; киими не содержахся злыми; всяк грех содеях, всякую нечистоту вложих в душу мою, непотребен бых Тебе Богу моему, и человеком. Кто возставит мя, в сицевая злая и толика падшаго согрешения; Господи Боже мой, на Тя уповах: аще есть ми спасения упование, аще побеждает человеколюбие Твое множества беззаконий моих: буди ми Спаситель, и по щедротам Твоим, и милостем Твоим, ослаби, остави, прости ми вся, елика Ти согреших, яко многих зол исполнися душа моя, и несть по мне спасения надежды. Помилуй мя, Боже, по велицей милости Твоей, и не воздаждь ми по делом моим, и не осуди мя по деянием моим: но обрати, заступи, избави душу мою от совозрастающих ей зол, и лютых восприятий. Спаси мя ради милости Твоея: да идеже умножися грех, преизобилует благодать Твоя: и восхвалю, и прославлю Тя всегда, вся дни живота моего. Ты бо еси Бог кающихся, и Спас согрешающих, и Тебе славу возсылаем, со Безначальным Твоим Отцем, и Пресвятым, и Благим, и Животворящим Твоим Духом, ныне и присно, и во веки веков, аминь.

Молитва 6. Святаго Иоанна Дамаскина

        Уязвен есмь аз сердцем, и истая мя ревность Твоя, и измени мя любовь Твоя, Владыко, связан есмь желанием Твоим. Да исполнюся от Твоея Плоти. Да насыщуся Животворныя и Боготворивыя Твоея Крове. Да восприиму Твоих благ, да напитаюся Твоего Божества, достоин да буду усрести Тя грядуща со славою на воздушнем восхищении, на облацех со всеми избранными Твоими. Яко да пою и покланяюся, и славлю Тя благодарно во исповедании, со Безначальным Твоим Отцем, и с Пресвятым и Благим и Животворящим Твоим Духом, ныне и присно и во веки веков, Аминь.

Молитва 7. Святаго Иоанна Дамаскина

На множество щедрот Твоих взирая, и пучину Человеколюбия Твоего, Христе Боже, се ныне дерзнух приступити, желание имея причаститися Святым Твоим и Животворящим Тайнам. Страхом и ужасом одержим, боюся прикоснутися, за множество грехов моих, да не вместо просвещения опален буду. Темже молютися и припадаю, Преблагий и Чудный Царю, прости согрешения моя вольная и невольная. И сподоби мя неосужденно прияти Пречистое Тело Твое и Честную Кровь Твою в просвещение, в наслаждение, в радость и веселие души и телу моему, ныне и присно и во веки веков, Аминь.

Молитва 8. Святаго Иоанна Дамаскина

        Господи, даждь милость ненавидящим мя, и враждующим ми, и поношающим ми, такожде и оклеветающим мя, да никтоже от них, мене ради нечистаго зло никако постраждет, ни в нынешнем, ни в будущем веце; но очисти их милостию Своею, и покрый их благодатию Своею, Благий.

Молитва 9. Святаго Симеона Метафраста

        О Отче, Сыне и Душе, Троице Святая, благосте неистощимая, во всех текущая, доброто многорачительная, не имущая сытости, верою единою спаси мя, и через надежду. О Свете Трисиятельный, о Троице Пресвятая, Троице Лицы, и Единице Существом, источниче премудрости и освящения подателю, верою единою спаси мя и через надежду. О Огню чистительный согрешением, душу мою очисти от прегрешений, души моея омый неведения, душу мою исхити от осквернений, душу мою удержи от помышлений: ум же воцари над разуменьми, страстем мя покажи всесильнаго царя, умную свещу возсияй сердцу моему. Свободи от тьмы греха, просвети, и украси помраченаго: оком воззри на мя милостивным, очисти и ублажи потемненнаго.
        О Отче, Сыне и Душе, Троице Святая, Ты ми подаждь Ангела светоносна, уму поспешника, пестуна и предстателя, души моей хранителя и плоти, вожда направляюща мя ко спасению. Ты мя земнаго сотвори освященна, Ты мя устрани земных мудрований, Ты ми изсуши злобныя потоки, ты ми источи слезныя тучи: Бог бо еси милостив, и благодатель незлоприятен всем беззаконновавшим, всеприступен всем согрешившим, долготерпелив всем отвергшимся, не праведных освящаяй, не непорочных просвещаяй.
Исповедание уставил еси спасения, подал еси покаяния образы, мне, гнусному и нечистому, мне, лукавому и окаянному, мне, темному и оскверненному: ибо беззаконновах древних множае, прогневах Тя, и раздражих зело, паче числа безчисленных звезд, паче песка морскаго согреших Ти. Нет вида злобы злейша, нет студа злобы лукавша, егоже не содеях окаянный аз на всякое время и место, душею, помыслом, словесы, и деянми: умножишася моея злобы мерзости, умножишася моя тмами злодейства, умножишася моих прегрешений бремена аки железная. Мнением согорчена ми есть выя, юзами неизбежными, стягнут есмь сердцем, ни воздвигнути главу мою могу, ни ослаба ми есть в совести. Недостойне высоту небесную зрю, недостойне человеческое зрю видение, недостойне собеседую ближнему, недостойне земную наступаю персть. Твою бо разжегох ярость вконец, гнев распалих страшный безместне, прогневах Тя и раздражих зело, пред Тобою всяку мерзость сотворих, ни едино же восхотех Твоих чистотных хотений, ни едину же вожделех Твоих вожделенных судеб, ни едино же сохраних Твоих премудрых повелений, ни един же удержах Твоих державных глагол.
        И ныне приклоняю Ти сердца моего колена, приклоняю главу омраченную, приклоняю выю оскверненную, Твоей благости выю мою приклоняю, Твоей благости моление приношу: согреших, беззаконновах, и блазнствовах, согреших, неправдовах, и преступих заповеди Твоя, согреших, неправдовах, и осудих, согреших, отвергохся и не устыдехся. Но моление творю Твоей благости, но мольбу приношу Твоему незлобию, но молю Твое крайнее благоутробие, но молю и вопию: спаси и очисти мя, остави множества моих согрешений, остави лютая моих долгов, остави многая моих осквернений, остави вся моих мерзостей, да не сокрушиши мя со грехи, да не умориши мя с беззаконми, да не с помыслы злыми свосхитиши мя, да не сожжеши мя с мерзостьми, да не лишиши мя благ вечных, да не Трапезы мя извержеши Безсмертныя, да не отчуждиши мя радости святых, да не отщетиши мя спасения моего. Крещения дар подаждь ми, втораго покаяния подаждь ми образ Божественный и великий: первый бо окалях грехами, первый оскверних мерзостьми.
        Даруй ми покаяние, Владыко, сподоби Священнаго Причащения, и Хлеба Живота, и Чаши Крове Боготочныя, во оставление моих согрешений, во избавление и спасение. В час же конечный горький, смертный, в час тяжкий и болезненный, в час темный и помраченный, спаси, ущедри, очисти мя, душу кротко разлучи от плоти моея оскверненыя, душу темную покажи просветованну, от лукавых избави бесов. Рукописания всяческая согрешений, списание моих долгов раздери, разсыпли во адову пропасть, расторгни и испепели до конца, кроткия и светлыя посли Ангелы тогда, отражающыя полки бесовския, душу восхищающыя от мучения, душу ущедряющия окаянную, горе возносящыя кроме согрешений, горе возносящия поклонитися Престолу огнеобразному и просветованному, причитающи там всем спасаемым, и сподобляющи радости святых.
        Приими ходатая благость Твою, даждь ми благодать Твою, ходатая изрядна, благостыню, незлобие, милосердие, крайнее благоутробие. Приими Ходатая втораго, превышшую мира красование, Матерь Деву Отроковицу, Божественную Лествицу и Жезл, Одушевленный Престол. Приими ходатая чин молниелучный, Престолы, Херувимы, Серафимы огненныя, Господствия, Силы, Власти, Начала, Архангелы, и Ангелы. Приими ходатая светлаго и светоноснаго Предтечу Твоего, освященнаго прежде пелен, проповедника Богоглаголива, прежде Владыки возсиявшего сущым во тме. Приими ходатая лики святых, лики пророк, патриарх, отец, апостол, мученик венценосных, и вся сонмы святых и светоносных. Приими ходатая Марию Египетскую, человека от земли небошественна же обаче. Приими ходатая Онуфрия Великаго, тело обнажившего, Божественною же одеждею делы благими оболченна странно. Бог бо еси милосердный и благодательный, Бог кроткий законопреступльшым, Бог подаяй оставление согрешений, Бог даруяй всем спасение. Мне же покажи всю благость Твою, мне излей струю благоутробия Твоего, ибо законопреступих всех множае, от ложесн самех, до нынешняго ми времене.
        Спаси мя чрез достоинство мое и чрез надежду, благостию и благостынею Твоею единою, яко да благословлю Тя и любовию величаю, яко да благодарю и пою Тя благочестно: в веце же будущем спасаемь, яко да благословен благословлю Владыку, Его же благословят небесныя силы, во веки вся несочтенныя, аминь.

Молитва 10. Молитва прилежна к Пречистей Богородице.

Творение Германа патриарха Константина града
Многих и великих насладихся даров от создавшаго мя Бога. Непамятлив же о всех сих явихся страстный и неблагодарный аз, приложихся скотом неразумным, и уподобися им. Нищ есмь добродетелей, богат страстьми. Студа исполнен, дерзновения Божественнаго отчужден. Осужден от Бога, оплакан от Ангел. Поруган и посмеян от бесов, обличаемь от совести. И прежде смерти мертв бых, и прежде суда того осужден. И прежде безконечных мук мучим, от отчаяния стужаемь. Се ныне в Твое едино прибегаю теплое заступление, Владычице, иже тьмами талант должен, не спасох, но со блудницами Отчее имение расточих. Помилуй мя, о Владычице, блудившаго паче блудницы, беззаконовавшаго паче Манасии, иже паче богатаго немилосерда бывша, скаредству раба, иже лукавым помыслом приятелище, иже смрадных и мерзких помысл сокровище хранительно, иже всякаго благодеяния отчужденнаго. Помилуй мое смирение, ущедри мою немощь, велико имаши дерзновение ко из Тебе Рождшемуся Богу, яко никтоже ин, вся бо можеши, яко Мати Богу, во всем крепка еси, яко всем Держительница тварем. Ни едино же Тебе не невозможно, аще восхощеши, точию да не презриши слез моих. Не мерзко Ти буди воздыхание мое. Не отрини моя сердечныя болезни, но Матерними Твоими мольбами, Иже Благаго Бога и Сына Твоего нудящи благоутробие, достойна мя сотвори окаяннаго, и недостойнаго раба Твоего первоначальную восприяти доброту, страстную же отложити некрасоту, свободитися от греха, поработитися правде, совлещися похотений, плотских сластей, одеятися во святыни душевных чистот, умертвитися мiру, жити же добродетели. В путь шествующу ми сшествуй. В мори плавающему ми сплавай, присно побеждающи лютых свыше борющих мя бесов, бдяща мя укрепляющи, спяща мя облегчающи, малодушствующа подъемлющи, недугующа исцеляющи, обидима избавляющи, оклеветаема неповинующи, в смерти бедствуема, скоро предваряющи и страшна мя видимым врагом и невидимым показующи выну. Да разумеют вси неправедно гонящии мя, чий раб есмь. Ей, Преблагая Владычице, услыши моя худыя молитвы, и да не посрамиши мя от чаяния моего, Упование всем концем земли, возврение плоти моея угаси, и иже в души моей дивияющую бурю. Безвременныя ярости укроти. Буесть и непокорство, суетныя моея юности от ума моего потреби. Нощная мечтания лукавых духов и дневных нечистых помышлений прилог от сердца моего отжени. Накажи ми язык глаголати полезная. Научи ми очи блюсти праводетелем правым. Нозе мои тещи непоткновенно сотвори блаженным путем заповедей Божиих. Руце мои освятивши, подобны сотвори, да достойно воздеются к Вышнему. Очисти моя уста, да со дерзновением призову Отца Страшнаго Бога и Всесвятаго. Отверзи ми слух, да услышу чувственно же и разумно, сладчайша сота и меда, иже Святых Писаний словеса, сотворити их Тобою укрепляемь. Даждь ми время покаяния и помыслом обращение. Напрасныя свободи смерти. Осужденна мя совестию обнови. К концу предстани ми, в разделении души от страстнаго моего тела, нестерпимую ону легчащи нужду, неизреченныя оны отъемлющи болезни, неутешаемыя утешающи тесноты, темных бесов свобождающи, горьких словоположитель, мытарств воздушных, и начал темных изымающи, рукописания моих многих грехов раздирающи, Богу мя вселяющи, и иже одесную Его блаженнаго стояния в Страшный Суд сподобляющи, вечных и непостояннных избавляющи мук, и присносущных и нетленных благ творящи мя наследника. Сие приношу Тебе дерзновение, Владычице Богородице, Свете омраченных моих очей, Утешение моея души, иже с Богом Упование мое и Предстательнице, Егоже яко всегда с Тобою благопребывательна моли, и очисти мя от всякия скверны, телесыя и душевныя. И удостой мя в настоящем веце неосужденно причаститися Всесвятаго и Пречистаго Тела и Крове Сына Твоего и Бога моего, в будущем же сладкия Небесныя Вечери и пищи райстей насладитися, идеже есть всем веселящимся жилище, сих улучити благ да сподобит мя, славяща великолепое имя Сына и Бога Твоего, со Безначальным Его Отцем, и Всесвятым и Благим и Животворящим Его Духом, ныне и присно и во веки веков, Аминь.
        Посем исповедание Православныя веры:
        Верую во Единаго Бога Отца, Вседержителя, Творца Небу и земли, видимым же всем и невидимым. И во Единаго Господа Иисуса Христа, Сына Божия, Единороднаго, иже от Отца рожденнаго прежде всех век, Света от Света, Бога Истинна от Бога Истинна, рождена, несотворена, Единосущна Отцу, Имже вся быша. Нас ради человек, и нашего ради спасения, сшедшаго с Небес, и воплотившагося от Духа Свята и Марии Девы, и вочеловечшася. Распятаго же за ны при Понтийстем Пилате, и страдавша, и погребена. И возшедшаго на Небеса, и седяща одесную Отца. И паки грядущаго со славою судити живым и мертвым, Егоже Царствию не будет конца. И в Духа Святаго, Господа, Животворящего, иже от Отца исходящаго, иже со Отцем и Сыном спокланяема и сславима, глаголавшаго пророки. Во Едину Святую, Соборную и Апостольскую Церковь. Исповедую едино крещение во оставление грехов. Чаю воскресения мертвых: И жизни будущаго века. Аминь.
        Таже, кондак глас 6:
        Вечери Твоея Тайныя днесь, Сыне Божий, причастника мя приими: не бо врагом Твоим тайну повем, ни лобзания Ти дам яко Иуда, но яко разбойник исповедаю Тя: помяни мя, Господи, по Царствии Твоем.
Егда же приближаешися к Божественным Тайнам, глаголи сие:
Се приступаю к Божественному Причащению.
Владыко, да не опалиши мя приобщением:
Огнь бо, рекл еси, недостойных попаляя.
Се, предлежит Христос на пищу всем,
Мне же прилеплятися Бозе благо есть,
И полагати на Господа упование спасения моего, аминь.
Посем и сие глаголи, аще волиши, трижды, приближаяся во уме обличая совесть свою:
Боготворящую Кровь ужаснися, человече, зря:
Угль бо есть недостойных опаляя.
Божия же Плоть обожает мя, и питает.
Обожает дух, ум же питает странне и чудне.
О человече, ужаснися, еда яси недостойне.
Огнь бо есть, грехи попаляя.
Но очисти мя, Господи, от всякия скверны.

        Посем крестообразно руце на персех положив,
        Распятаго Телу и Крови со страхом причастися.

        Егда же получиши дражайшаго приобщения Животворных и тайных Дарований,         воспой абие, и благодари зело и сия тепле от души Богови глаголи:

[ обсудить на форуме ]